Liturgi Ari Pentakosta Parjolo

PARTORDING NI ACARA PESTA PARJOLO PARNINGOTAN DI HASASAOR NI TONDI PARBADIA HURIA KRISTEN INDONESIA (HKI) Minggu, 15 Mei 2016

Topik:

“Nasa na tinogihon ni Tondi ni Debata, angka i do Anak ni Debata”

1.   JOUJOU MANOMBA DEBATA

      P       : Hamu dongan sahuria, tapuji ma Tuhanta Jesus Kristus  naung pasauthon bagabagaNa, i ma HASASAOR NI TONDI PARBADIA, na tapestahon dohot tahalashonhon sadari on.

     H       : I ma tutu. Dibagasan las ni roha ma hami mamuji Debata Sitolusada i .

     P       :  Antong andorang so bongot hita tu parsaoran na badia rap dohot Debata di tongatonga ni huriaNa martangiang na hohom ma hita dalan pahibulhon roha dohot pingkiranta.

(Martangiang na hohom, manghuling musik angonangon)

      P       :  Tapangiar ma soaranta mamuji Debata, marende ma hita!

      P+H  :  (Marende BE No. 102:1 “O Tondi Parbadia, Bongoti”)

                   O Tondi Parbadia i  bongoti rohanami be ro sipatiur roha

                                O Sondang sian surgo i sondangi rohanami be tu halalas ni roha.

                  Asa masa patupahon pinodahon ni hataMu sai tu hami ma rohaMu.

(Jongjong)

2.   VOTUM – INTROITUS - TANGIANG

      P       :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano on; dipasaor ma dameNa tu tondimuna, Amen.

      H       :  Ale Jesus Tuhannami, bereng hami na dison. PinarmahanMi do hami saluhutna na dison. Sai asi rohaM di hami, sai pangolu hami on, Amen.

      P       :  Sian Sion, situan ni hinadenggan, marsinondang Debata. Sai na ro do Debata, jala ndang tagamon hohom Ibana; ai songon on do didok Jahowa:

      H       :  UsehononKu ma aek tu angka na mauas dohot angka sunge tu na mahiang. UsehononKu ma tutu TondingKu tu pinomparmuna nuaeng jala pasupasungKu tu pinomparmu sogot.

      P       :  Jahowa do Debata, jala Ibana manondangi hita. Tambathon hamu ma angka pelean pesta i  sahat ro di angka tanduk ni langgatan.

                   Di dongani Tuhan Debata ma hita on saluhutna, Amen.

                   Haleluya, Haleluya, Haleluya.

      H       :  (Mangendehon) Haleluya, haleluya, haleluya.

      P       :  Martangiang ma hita!

                   Ale Tuhan Jesus. Hudok hami mauliate tu Ho sian nasa rohanami, ala dipaojak Ho huriaM di tano on, jala ala dohot hami dijou Ho tusi. Sai suru ma Tondi Parbadia tu rohanami, asa tung huparhatopot hami Ho hangoluannami, asa lohot tu Ho hami marhitehite haporseaon na sintong, jala asa tongtong huhalashon hami pasangaphon GoarMu, na tarpuji ro di salelenglengna. Amen.

(Hundul)

3.   Marende BE No. 108:1-2 “Baenma Gabagaba”

      Baen ma gabagaba dohot bungabunga nang pelean i.

      Ai nuaeng ma jumpang ari parningotan, Pentakoste i;

      Haroro ni Tondi do, i ma Tondi Parbadia, masuk tu huria.

                                Jangkon ma Ibana, ai asi rohaNa ro tu hita on,

                                Asa sondangonNa, tiur bahenonNa, parrohaon tongtong.

                                Jangkon ma Ibana da asa lao sude arsakmu, nang pardangolanmu.

4.   PATIK  

      P       :  Tangihon hamu ma Hata ni Debata songon singkat ni Patik di pestanta sadari on, i ma na tarsurat di Galatia 5:16-17, songon on ma hataNa:

                   “Alai on do hudok: Marguru tu Tondi i ma hamu marparange; unang pasaut hamu hisaphisap ni daging! Ai na maralohon tondi do sangkapsangkap ni daging, jala maralohon daging i do sinangkap ni tondi: Na masialoan do i, asa unang dipasaut hamu pinangido ni rohamuna.”

                   Rap ma hita mangido gogo!

      P+H  :  Ale Tuhan Debata, sai pargogoi ma hami mangulahon na hombar tu HataMi, Amen.

5.   Marende BE No. 463:1-2 “PasupasuM TongosonMu”

      PasupasuM tongosonMu i do didok hataM i,

      Suru TondiM na badia, bosur ma baen rohangki.

      HagogoonMu songgop ma tu rohangkon.

      Unang sai holan manetek, gohi sandok diringkon.

                                Buat ma angka pangambat, unang songsong dalan i.

                                Mual ni aek hangoluan ringkot do dirohangki.

                                HagogoonMu ...du.

(Jongjong)

6.   MANOPOTI DOSA – BAGABAGA HASESAAN NI DOSA

     P       :  Tatopoti ma dosanta, martangiang ma hita!

                   Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, na manguhumi jolma manisia. Na ro do hami tu joloM manopoti dosanami, angka na huula hami marhite sian pangalasionnami di PatikMu, i ma marhite sian tubutubu ni rohanami na roa i, nang sian panghataionnami na so ture, ro di pangoloinami di hisaphisap ni rohanami.

     H       :  Na tama situtu do hona uhum hami ala ni dosanami i, alai na tarsolsol bagi do hami nuaeng ala ni i. Asi ma rohaM di hami, ale Debatanami. Pardenggan basa jala Parasi roha do Ho ala ni Anak haholongan ni rohaM, Tuhan Jesus Kristus Tuhannami.

      P       :  Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho di bagasan hatigoran dohot habadiaon, gabe sahat hami tu hangoluan na so ra suda, na pinarbagabagaM di angka na porsea di AnakMu, Tuhan Jesus Kristus, Tuhannami. Amen.

      P+H  :  (Mangendehon BE No. 174:3 “Torop dope na siat i”)

                   Pardosa ho, didok roham, na so tama be dohot?

                   Ndang pola ala ni dosam umbaen na sundat bongot.

                   Ai nunga sae do dosam i digarar Tuhan Jesus i,

                   Naung sae, naung sae, naung sae do dosami.

      P       :  Bagabaga ni Debata taringot tu hasesaan ni dosa.

                   Ro ma hamu, asa mangolu tondimuna, ninna Tuhan Jahowa. Tung sura rara dosamuna songon abit bunga dapdap, bontar do bahenonku songon itak; nang pe rara songon abit hasumba, gabe songon hapas do muse. Hasangapon ma di Debata na di ginjang!

      P+H  :  Amen.

(Hundul)

7.   Marende BE No. 109:2-3 “Sai Songgopi Hami on”

      Tondi hasangapon i sai ingani rohanami,

      Pargogoi ma hami be maralohon dosanami,

      Asa tung malua hami sian hadosaonnami.

                                Jolma manisia pe sai sondangi ma luhutna.

                                Asa olo sasude ro tu Jesus, Sipalua,

                                Rarat baen harajaonNa tu saluhut manisia.

8.   EPISTEL

      P       :  Hata ni Debata na gabe turpuk epistel di minggunta sadari on ima na tarsurat di Psalmen 104:24-35b, tajaha ma marsingkat soring:

                   Tung na lan situtu do angka jadijadianmu, ale Jahowa! Saluhutna i dipauli Ho marhitehite hapistaran, tung gok jadijadianmu do tano on.

      H       :  Tole laut i na balga jala na lambas, disi do rumamang angka gulokgulok na so habilangan, binatang angka na metmet rap dohot angka na balga.

      P       :  Disi do mardalani angka parau, tole buea, na jinadihonmu, asa marmeammeam disi.

      H       :  Saluhut nasida mangaranap tu Ho, asa lehononmu sipanganonnasida di tingkina be.

      P       :  Molo dilehon Ho di nasida, dijomputi nasida, molo dipatedek Ho tanganmu, butongan nasida di na denggan i.

      H       :  Molo ditabunihon Ho bohim, holsoan ma nasida, ditait Ho ma hosanasida, monding ma nasida, jala mulak nasida tu orbuknasida hian.

      P       :  Molo ditongos Ho tondim, tartompa ma nasida, jala dipaimbaru Ho do rupa ni tano on.

      H       :  Sai ro di salelenglelengna ma hamuliaon ni Jahowa * marlas ni roha ma Jahowa mida angka jadijadianna i!

      P       :  Molo Ibana mamereng tano on, jadi humuntal ma, dijama angka dolok, jadi martimus ma.

      H       :  Endehononku ma Jahowa saleleng di ngolungku, umpalu parhinaloan ma ahu umpuji Debatangku, saleleng adong dope ahu.

      P       :  Sai dihalomohon rohana ma nian pingkiranku, ianggo ahu, sai marlas ni roha do ahu mida Jahowa.

      P+H  :  Sai siap ma nian angka pardosa sian tano on, jala unang adong be angka parjahat!

      P       :  Martua do angka na tumangihon jala na umpeop Hata ni Debata, Amen.

9.   Marende BE No. 466:3-4 “Nunga Ro Au”

      Sai sahaphon tu tondingku, Tondi Parbadia i.

      JoroM i ma baen rohangku, sai ingani diringki.

      Hatuaon i, las ni rohangki. Ai hibul do hupelehon nasa diringki,

                                Sai gok Tondi ma rohangku, mate roha diri i.

                                Angka arta sian tano, ndang tusi be rohangki. Hatuaon i ...du

(Jongjong)

10.          MANGHATINDANGHON HAPORSEAON

      P       :  Rap ma hita manghatindanghon haporseaonta i songon panghatindanghonon ni donganta sahaporseaon di sandok portibi on, rap ma hita mandok.

      P+H  :  Ahu porsea ..., Amen.

(Hundul)

11.          Marende BE No. 102:3... “O Tondi Parbadia i, Bongoti” (P. Pelean I & II)

      Sai pargogoi ma hami on mangihutihut hataM on di pardalanannami.

      Haporseaonnami pe tambai tung masa aha pe na bernit taononnami.

      Tatap, tatap sude hami, rohanami pasonangkon, Hajolmaon hamonangkon!

                                Sungguli hami on sude huhut paburju hami be mangalo dosanami.

                                Papir ma tondinami on, papos ma rohanami on, di paraloannami.

                                Gohi, gohi rohanami asa hami mambolongkon Losok dohot halemba on.

      Ho batu mamak na togu, na tau ojahan situtu, Paojak rohanami

      tu hata hasintongan i. Tung unang olo lilu be nang sada sian hami,

      Lehon roha na tumogu, na umburju, manggoari Jesus Kristus Tuhannami.

12.          JAMITA - Rom 8: 14-17

13.          Marende BE No. 461:1+3 “Songgop tu Hami”

      Songgop tu hami na di joloM on, o tondi ni Debatangki.

      Uhir patikMu tu rohangkin on, O Tondi ni Debatangki.

      Bereng siholmu di haroroM i, molo Ho ro, nda hisar tondingki?

      Didihon ma tu au on apiM i, O Tondi ni Debatangki.

                                Lehon hataM, i ma tau podangki, Debatangki na gogo i,

                                Asa sai talu sude musuM i, Debatangki na gogo i.

                                Manghatindanghon tongtong goarMi, asa malua pardosa disi.

                                Asa dijangkon Tuhanta ma i. Debatangki na gogo i.

14.          TINGTING & TANGIANG TINGTING

15. Marende BE No. 467:1... “Asi ni RohaM Hupuji”  (P. Pelean III)

      Asi ni roham hupuji ala Ho manobus au.

      Dipaias Ho rohangku, gabe soranganMu au.

      IngananMu rohanami, TondiM i manggohi i.

      Pangke dohot ngolunami gabe ulaulaM i.

                                Sai ramoti ma rohangku, asa boi gohanMu au.

                                Sai mabaor ma pasupasu nang marhite sian au,

                                IngananMu ...du.

      Naeng huhatindangkon hami hagogoonMi tongtong,

      Paluahon na mardosa, nang parjahat na bolong.

      IngananMu ...

                                Sai papulik rohanami gabe pangoloi di Ho.

                                Asa marsahala hami lao manghatindangkon Ho.

                                IngananMu ...

 (Jongjong)

16. PARSURUON

      P       :  Hamu angka dongan na hinaholongan, saleleng di portibion hita sai rongom do angka parungkilon, haporsuhon dohot sitaonon manosak ngolunta. Manahan ma hita mangadopi saluhutna i marhite na marningot Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton.

      P+H  :  Ro ma Ho parasi roha! Pagirgir rohangkon mangendehon denggan basa ni lehonMu di au on.        Tiruonhu ma suruan mangendehon sangapMi, pujionhu Ho Jahowa partanobatoanki.

      P       :  Pesta Parningotan Hasasaor ni Tondi Parbadia sadari on paingothon  asa borhat hita gabe sitindangi ni Barita Na Uli  i na gabe hapapatar paboa naung di hita silehonlehon ni Debata ima Tondi Parbadia i. Borhat ma hamu ai didok Tuhanta do: “Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on” Amen.

17.          TANGIANG PANUTUP

      P       :  Martangiang ma hita pasahathon peleanta tu adopan ni Debata!

(Laos diuduti dohot tangiang panimpuli minggu Pentakosta)

                   Rap ma hita mangido di hata ni tangiangta!

      P+H  :  Ale Amanami..., Amen.

      P       :  Jalo hamu ma pasupasu na sian Tuhanta! ...

      P+H  :  (Mangendehon) Amen, Amen, Amen. 

Liturgi Ari Hananaek ni Tuhan Jesus

PARTORDING NI ULAON

PESTA PARNINGOTAN ARI HANANAEK NI TUHAN JESUS

Kamis, 5 Mei 2016

PANGARADEION

1.   Tangiang marsasahalak (Saat Teduh).

2.   Sude ma parhobas di ulaon kebaktian rap dohot angka parhalado martangiang borhatborhat sian bilut parhobasan.

3.   Prosesi.

--- (Manghuling ma giringgiring udut ma dohot organ/musik angonangon) ---

(Jongjong)

TABI & HUHUASI

P          :     Tabi dohot parhorasan ma di hamu saluhutna!

H          :     Horas ma tutu.

P          :     Hamu angka dongan sahaporseaon! Na marlas ni roha do hita di tingkion marningot  hananaek ni Tuhanta Jesus Kristus tu harajaonNa di banua ginjang. Andorang so manaek Ibana tu harajaonNa i jumolo do di ajari huhut di podai Ibana angka siseanNa asa marbisuk jala margogo nasida laho mambaritahon Barita Nauli jala mangadopi angka na naeng masa. Antong mandok mauliate ma hita tu Tuhanta jala ita puji ma Ibana. Marende ma hita!

P+H     :     (Marende BE. 15:1-2 “Aut na saribu hali ganda”

                   Aut na saribu hali ganda,  saringar ni soarangki,

                   Naeng nasa gogo bahenonku, mamuji Debatanta i,

                   Paboa las ni rohangki, hinorhon ni pambaenna i

                                                Tung sura sahat soarangku, tu ujung ni portibion,

                                                Naeng nasa jolma haraonku, mamuji Debata tongtong.

                                                Tama do nasa hosangki, hubaen pasangap Tuhan i.

VOTUM

P          :     Marhitehite goar ni Debata Ama, dohot goar ni Anakna Tuhan Jesus Kristus, dohot goar ni Tondi Porbadia; na tumompa langit dohot tano on, dipasaorma dameNa tu tondimuna, Amen.

H          :     (Mangendehon BE. 205:1 “Ale Jesus Tuhannami”)

                   Ale Jesus Tuhannami, bereng hami na dison!

                   PinarmahanMi do hami saluhutna na dison.

                   Sai asi rohaM di hami, sai pangolu hami on.

INTROITUS & TANGIANG

P          :     Nunga didok Jahowa mandok Tuhanku: Hundul ma Ho di siamunHon, paima hubahen angka musuM sidegedegean ni patMu.

H          :     Marrongoman bangsoM ro sian lomona di ari parporanganMu, marpahean habadiaon; songon nambur sian ampuan ni andos torang ro do tu Ho paranganMu angka na umposo.

P          :     Nunga pola maruari Jahowa, jala ndang tagamon solsolanna rohaNa : Sai Ho do malim ro di salelenglelengna mangihuthon horong ni si Melkisedek. Sai patimbul ma diriM, ale Debata, tu atas ni langit hamuliaonMu tu sandok tano on.

                   Di dongani Tuhan Debata ma hita on saluhutna, Amen.

                   Haleluya, Haleluya, Haleluya.

H          :     (mangendehon)  Haleluya, Haleluya, Haleluya

P          :     Martangiang ma hita! 

                   Ale Tuhan Jesus Kristus Anak ni Na tumimbul, naung manaek tu banua ginjang di siamun ni Debata ama!  Sai suru ma Tondi Porbadia tu rohanami be, asa Ibana tongtong mangajari hami, jala patauhon hami gabe sitindangiM di tongatonga ni na humaliang hami. Godang na masa na mambahen lomos rohanami. Pargogoi ma hami huriaM na di potibion on asa tongtong marhaporseaon tu Ho.

H          :     Lehon tu hami Parhalado na burju tu hatam, na tongtong mangaradoti ulaonna. Parsahalai ma nasida mangalo bisuk ni sibolis i, asa tung rarat harajaonMu di hasiangan on.

P          :     Sai pamonang ma hami manaluhon dosa dohot hamatean. Urupi ma hami padaohon biar sian roha nami. Papos ma rohanami marhitehite Tondi Porbadia, paboa  na dongananmu do hami sahat ro di ujung ni hasiangan on. Oloi ma hami di bagasan goar ni AnakMu Tuhan Jesus Kristus, Tuhannami, Amen.        

(Hundul)

MARENDE BE. 97:1-2 ”Patimbul be ma sangap”

Ingoton ma sadari on parnaek ni Tuhan Jesus

Tu habangsaNa na tongtong  na so tarbaen be meret

Tasomba ma Tuhanta i naung mulak tu Amana i, tapuji ma Ibana

                         Ai nunga mungkap dalan i di angka na porsea

                         Lao mamongoti surgo i malua sian jea

                         Naung mangonai tu sasude na mangulahon dosa i, pinuji ma Tuhanta.

REFLEKSI  ”HANANAEK TUHAN JESUS TU BANUA GINJANG” (SINGKAT NI PATIK)

P          :     Na marlas ni roha do hita nuaeng manghalashon parningotan di Ari Hananaek ni Tuhanta Jesus Kristus tu banua ginjang. Dung salpu haporsuhon na tinaonna i, dipatandaphon do dirina mangolu tu nasida marhitehite lan tanda, i ma na pinataridahonna dirina tu nasida leleng ni opatpulu ari, dohot manghatahon taringot tu harajaon ni Debata.

H          :     Didok Tuhan Jesus : Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on.

P          :     Jadi dung didok songon i, tarhinsat ma Ibana dipanotnoti nasida :dung i diholipi ombun i ma Ibana sian jolo ni matanasida.

Ama     :     Di na tinuluthon nasida dope Ibana na laho i tu ginjang, nunga jongjong di lambungnasida dua halak parulos na marlinanglinang.

P          :     Angka na mandok: O hamu halak Galilea, aha ma sai jongjong hamu mamerengi dompak ginjang? Anggo Jesus i, na tarhinsat  sian lambungmuna tu banua ginjang i, na ro do Ibana sogot, songon  na ni idamuna.  Ibana laho dompak banua ginjang.

Ina       :     Dung i, mulak ma nasida tu huta Jerusalem sian dolok na margoar dolok Jetun, na jonok tu Jerusalem; na hadalanan di ari Sabat  do daona.

P          :     Angka i do saluhutna mandatdati martangiang sian sada ni roha nasida, rap dohot angka parompuan dohot si Maria, ina ni Jesus ro di angka anggina i.

Nap.     :     Tung di halomohon Tuhanta do, asa marparange hita songon angka anak hatiuron mangadopi ragam ni na masa di ngolunta on. Ai didok do: Pasomal-somal ma dirim tu hadaulaton.

P          :     Ai otik do guna ni na pabosihon daging; alai tu saluhutna do hasea hadaulaton i, ai hangoluan nuaeng nang sogot dibagabagahon. Haposan do hata i jala tau situtu jaloon. Ai ala ni i do, umbahen loja hita jala marungkil: ala manghirim hita di Debata na mangolu, Sipalua halak saluhutna, alai sumurung angka na porsea. Antong ita dok ma mauliate tu Debata Ama, siala asi dohot holong ni rohaNa, jala rap ma hita mangido gogo sian Debata laho mangulahon lomo ni roha di ngolunta be.

P+H     :     Ale Tuhan Debata, sai pargogoi ma hami mangulahon lomo ni roham di portibi on. Amen.

MARENDE BE. 432 “Sian Hurungan ni Dosangki”

Sian hurungan ni dosangki ro au tu Ho, ro au tu Ho.

Tu haluaon di mudarMi Jesus au ro tu Ho

Nasa rohangku malum, hipas gabe mamora, nang pe pogos,

Sian jeangku ro au tu Ho, Jesus au ro tu Ho.

                         Sian ilangku,  nang ramunhi :,:  ro au tu Ho :,:

                         Gabe na ias nang rohangki, Jesus, au ro tu Ho.

                         Sian holsongku  tu  sonangMi, sian runduthu tu dameMi,

                         Sian arsakku tu holongMi, Jesus, au ro tu Ho.

(Jongjong)

MANOPOTI DOSA 

P          :     Hamu angka dongan sahaporseaon, di Ari Parningotan Hananaek  ni Tuhanta Jesus Kristus sadari on, denggan do molo tapaunduk rohanta laho marningot angka pambahenanta na sailaon. Godang do angka dosa na tabahen: marhitehite pingkiran, panghataion dohot marhitehite pambahenanta maradophon Tuhanta Debata dohot  tu donganta jolma. Na manaek do Tuhanta tu harajaonNa laho mangondihon hita tu Ama i. Na hundul do Ibana di siamun ni Debata Ama, laho manguhumi halak pardosa. Nasa na porsea di Ibana na mangongkuhon angka dosana dapotan hasesaan ni dosa, jala nasa na so porsea di Ibana hona uhum. Alani i, di na jongjong hita nuaeng di adopan ni Debata taboan be ma angka dosanta jala ta pangidoma hasesaan ni dosa sian Ibana.

--- (Manghuling organ/musik mangendehon BE. 171 sa ayat) ---

H          :     Ale Tuhan Parasiroha na sumurung, na jongjong do hami nuaeng di adopanMu na marmulia i manopoti saluhut dosa nami na godang i. Asi ma rohaM di hami, sesa ma dosa nami.

P          :     Hamu Ale angka dongan, songon i ma holong ni roha ni Debata di portibi on  dibagasan anak-Na Tuhan Jesus Kristus, dihophop do sude dosa dohot hajahatonta. Ala i molo tapamanat jala ta sulingkit sude parulaonta, tung jotjot do hita manimbil sian lomo ni roha-Na. Ndang ta haholongi donganta songon dirinta sandiri, sai tongtong dope mian hita di angka ragam ni pangalaho hajahaton. Siala parulanta na so ture, gabe ta panghilalahon do hasusaan dohot lan hapariron di ngolu on.

H          :     O Tuhan, jotjotnai huhalupahon hami panghophoponMi dibagasan ngolu nami. Nuaeng hutopoti hami ma sude angka dosa pangalaosion nami tu adopan-Mu. Ale Tuhan Jesus birubiru ni Debata asi ma rohaM di hami, sesa ma saluhut dosa nami.

P          :     Ale Tuhan! Tung balga do holongMu di hami, ndang tarasam hami marhite sere dohot perak. Nuaeng jongjong ma hami di adopanMu manopoti  sude dosa nami na godang i, asi ma rohaM di hami. Ramun situtu do ngolu nami alani parulan nami na so ture. Songon ama, ina, ianakhon hami di ruma tangga, ndang Ho be hubahen hami ojahan dohot sitiruon, nunga jumotjotan hami marojahan tu gogo, hamaloon dohot pingkiran nami sandiri. Nunga ngolu hasonangan portibi hubahen hami sitiruonnami. Jotjot do hami marminggu, alai ndang mangolu tondi ni parmingguon i di hami. Jotjot do hami martangiang, alai ndang mangolu tondi partangiangon di hami. Jotjot do hami marende partondion, alai ndang mangolu tondi ni ende i di hami. Ale Tuhan, disaluhut angka dosa na hu ulahon hami mangido ma hami tu Ho.

H          :     (Mangendehon BE. 171” Tandai Ma Au”)

                   Asi ma rohaM, taringot tu Pangalahongku

                   Olo Tutu, jotjot do na lilu dalanku

                   Sesa dosangku sude Debata

P          ;     Ale Tuhan! Tung so hagoaran hami do sude angka dosa na hu ulahon hami. Ala i hupatedek hami ma haramunonnami di adopan-Mu. Godang sian tongatonga ni ruasMu na tumatangis alani parsorion di ngolu on; godang sian angka ianakhonnami na mandele ala hinaborat ni mangalului parkarejoan; godang sian tongatonga ni ama dohot ina na marungkil ala na so boi masiantusan di ruma tangga. Tondi na mangahut tu diri dimangmanghon, alai tondi manarihon dongan dihalupahon. Tondi hamongkuson dihalomohon, alai tondi na masileanan di halupahon. Ale Tuhan, disaluhut angka dosa na hu ulahon hami mangido ma hami tu Ho:

H          :     (Mangendehon BE. 171” Tandai Ma Au”)

                   Asi ma rohaM, taringot tu Pangalahongku

                   Olo Tutu, jotjot do na lilu dalanku

                   Sesa dosangku sude Debata

BAGABAGA HASESAAN NI DOSA

P          :     Tabege ma baga-baga ni Debata taringot tu hasesaan ni dosanta:

                   “Ai songon on do holong ni roha ni Debata tu portibi on, pola anakNa na sasada i dilehon, asa unang mago ganup na porsea di Ibana, asa hangoluan na saleleng ni lelengna di ibana.”

                   Antong haporseai ma naung sesa dosam disesa Jesus. Unang oloi be sibolis di ngolum. Pasangap ma ibana olat ni on ro di saleleng ni lelengna.

H          :     Hasangapon ma di debata na di ginjang, Amen.

(Hundul)

MARENDE BE. 177:1, 3-4 “Ndada Tarhatahon”

Ndada tarhatahon hahoholong ni, roha ni Tuhanta di pardosa i.

Marsak do rohaNa  Mida jolma i, na so olo unduk di hataNa i.

                         Jesus do mandaoni dosa ni sude , nunga digarari  do utangta be

                         Nunga pola mate Tuhan Jesus i, paluahon hita sian dosa i.

O hamu pardosa sai tandai ma i,  lehon di Ibana rohamuna be

I do pangidoan ni Tuhanta i, asa sai tong sonang bahenonNa i.

E P I S T E L

P          :     Hata ni Debata na gabe turpuk epistel di pestanta sadarion tarsurat di Psalmen 47:2-10, tajaha ma marganti sorin:

                   Martopaptopap tangan ma sude hamu angka bangso! Puji hamu ma Debata mardongan soara olopolop!

H          :     Ai Jahowa do na tumimbul, na songkal, Raja bolon do Ibana gumomgom liat portibi on.

P          :     Papatuonna do angka bangso tu hita dohot angka marga tu toru ni patta.

H          :     Ibana do mamillit di hita pargolatanta, hatimbulon ni si Jakkob, na hinaholonganna i. Sela.

P          :     Manaek do Debata mardongan parolopolopon, Jahowa mardongan soara ni sarune.

H          :     Sai endehon hamu ma Debata! Sai endehon hamu ma Rajanta i! Endehon ma tutu!

P          :     Ai Debata do Raja ni liat portibi on, endehon hamu ma ende sipodaon.

H          :     Debata do mangarajai angka parbegu, hundul do Debata di atas habangsa habadiaonna i.

P+H     :     Marpungu do angka na sangap ni angka bangso tu * bangso ni Debata ni si Abraham, ai Debata do nampuna angka * lombulombu raja ni tano on, timbul situtu Ibana.

P          :     Martua ma angka na umbege jala na umpeop Hata ni Debata!

P+H     :     Amen.

MARENDE BE. 273:1+4 “Jesus Tuhanku rajai ma au”

Jesus Tuhanku rajai ma au on asa mangihut tu Ho au tongtong

Topot rohangku ingani ma i, unang be masuk na asing tusi

Jesus pasonang rohangku tongtong asa marguru tu Ho au tongtong

                         Na marhaposan tu Jesus tahe sai na martua ibana muse

                         Na marsigantung tu Jesus tutu jala marroha na bonar burju

                         Sonang ibana di portbi on, sonang nang sogot di surgo tongon

(Jongjong)

MANGHATINDANGKON HAPORSEAON

P          :     Tahatindangkon  ma   haporseaonta i,   songon  na hinatindanghon ni  donganta sahaporseaon di sandok portibion. Rap ma hita mandok!

P+H     :     Ahu porsea…du, Amen.

(Hundul)

MARENDE BE. 100 : 1 …  “Bongoti Rohangku” (PELEAN I & II)

Mardongan olopolop, manaek Tuhanta i, jinangkon ni na torop surusuruan i.

Antong, nang hita pe, tapuji ma Tuhanta, marendeende hita, marolopolop be.

Na mulak do Tuhanta tu habangsaNa i, tu lambung ni AmaNa di siamunNa i.

Disomba sasude na di banuaginjang Tuhanta i, na monang ro sian tano i.

— organ/musik —

Tatimbang ma lapangNa umbaen na songon i, ai naeng ma dohot hita tumopot surgo i. Antong, taingot ma ianggo Tuhan Jesus, Ibana do patulus nidok ni Debata.

 Ditaon do hamatean humophop hita on, pature pardalanan, na sian tano on,

Manogu hita be tu lambung ni AmaNa i, disi, di adopanNa, naeng sahat sasude.

— organ/musik —

I pe ringgas ma hita mangalo dosa i manggotap roha daging nang hajahaon pe

Tahalungunhon be Tuhanta na  di ginjang Ibana do na monang i ma tatiru be.

O Jesus Tuhannami asi ma rohaMi  sai sesa dosanami palua hami be.

Pamasuk hami on tu hangoluan sogot, sai loas hami dohot mamuji Ho tongtong.

J A M I T A (Epesus 1:15-23)

SUNGGULSUNGGUL

MARENDE BE. 99 : 1 …  “O Tondi Parbadia i, Bongoti“ (PELEAN III)

O Ulu balang na gogo, songon sadari on do Ho manaek tu hasangapon!

Naung sidung do ulaonmi ; na ringkot patupaon mi, humophop hajolmaon.

Sabam, tongam do Ho muli tu na uli marhabangsa di siamun ni Jahowa

                         Marloksaloksa Serapim, marriburibu Kerubim mamuji Ho na monang;

                         Dibaen naung pinadomumi saluhut manisia i tu Debata di ginjang.

                         Puji, puji Jesus Kristus, naung patulus, saluhutna tinonahon ni Amana

--- organ/musik ---

O Jesus, Ho do ulu ni luhutna na porsea i , ruasmu anggo hami.

Ho hangoluannami on, Ho hasonangannami on, Ho hagogoonnami!

Suru, togu rohanami, asa hami mangalehon tu Ho nasa hasangapon

                         Sai taiti rohanami on, urupi hami on tongtong mangalo dosanami.

                         Paias rohanami be, parangenami baen ture, nang pangkataionnami.

                         Tompa roha na imbaru, asa haru monang hami, maralohon dosanami  

PARSURUAN TU NGOLU SIGANUP ARI

P          :     Didok Tuhan Jesus Kristus,di na laho manaek tu banua ginjang: “Laho ma hamu tu liat portibion;  jamitahon hamu ma  barita  na uli i tu nasa na tinompa. Na porsea jala tardidi dapotan haluaon; alai na so porsea i, hona uhum do“.

H          :     Martua ma na pinaburu-buru ni halak ala ni hatigoran, ai di nasida do harajaon banua ginjang i.

P          :     Ihut tusi, didok Tuhan i dope tu ganup hita na porsea: “Nasa na binahenmuna tu sada sian anggingku na metmet on, na tu ahu do i dibahen hamu “. Antong, ita surdukhon ma tanganta mangurupi angka donganta nahurangan so marnida bohi. Ai na tu Tuhan i do na tabahen disi. Tapungka ma i tu na jumonok tu hita.

H          :     (Mangendehon  BE. 518 : 1    “Marsinondang Dibaen”)

                   Marsinondang di baen Jesus asi ni rohana i,

                   Jala hita do di suru, asa ta paboa i.

                   Tapagalak palintonta, tapatiur dalan i,

                   Ai torop do pe na lilu, sai hatop ma mulak i.

P          :     Mulak ma hamu tumopot bagas dohot ulaon muna be.  Pos ma rohamuna, donganan ni Tuhan Jesus do hamu mangulahon lomo ni roha ni Debata marhitehite Tondi Parbadia. Mardame ma ho muli.

H          :     (Mangendehon  BE. 518 : 1    “Marsinondang Dibaen”)           

                   Dongan sotung mintop lampu na ringkot tu dongan i,

                   Sotung mago angka jolma di baen halembaonmi.

                   Tapagalak palintonta, tapatiur dalan i,

                   Ai torop do pe na lilu, sai hatop ma mulak i.

TANGIANG PANIMPULI

P          :     Martangiang ma hita pasahathon peleanta tu adopan ni Debata!

                   Ale Tuhan Debata…du, Amen.

                   Rap ma hita mangido di hata ni tangiangta…

P+H     :     Ale Amanami na di banua ginjang…du, Amen.

P          :     Jalo hamu ma pasupasu na sian Tuhan Debata!

                   Dipasupasu jala…du, Amen.

P+H     :     (Mangendehon) AMEN, AMEN, AMEN